الرئيسية / أقلام وآراء / بلد عايشة ع نكشة: النفقة يااا!!

بلد عايشة ع نكشة: النفقة يااا!!

 

بثينة حمدان

بتعرفوا إنه فلسطين بلد متقدم ومتحضر ومتدين ومحافظ، ونحترم المرأة والعائلة .. لهيك عنا صندوق للنفقة؟؟

صندوق النفقة ماخد دور الزلمة.. زلمتنا الي مش قادر يصرف ع اولاده ومرته أو طليقته أو حتى ابوه وامه وقرايبه الفقراء الي فش الهم غيره ومنهم ذوي الهمم، أو يمكن زلمتنا بدوش يصرف عليهم جكر وعناد وقلة وفاء، ساعتها أول ما يطلع قرار المحكمة بالنفقة وما يدفع، بتاخدوا القرار لصندوق النفقة، وخلال 15 يوم بتنزل النفقة وهيك بصير الزلمة مديون للصندوق يعني للدولة (فخار يكسر بعضه.. خليهم يلاحقوا بعض عالقرش المهم العيلة ما تضيع ولا يتشردوا الأولاد في الشوارع!!! (الله يشردك يالبعيد)

إجمالي مصاريف الصندوق سنويا بتوصل قريب ال 2 مليون شيكل، معظمها تصرف عالأطفال، وفي الدرجة التانية عالزوجة الي مش راضي يصرف عليها: (الزلمة). طيب الزوجة ومش طايقها طب والأولاد؟ هو مين الي خلّفهم صحيح؟؟ طبعا في زوجات بهجوا من البيت وما بطلبن الطلاق لأنه معهاش تصرف عحالها! أو هو بدوش يطلقها زناخة أو لأنه بفكرها مطوبة ع اسمه –دخيل اسمه- أو لأنه خايف يطلقها لترفع عليه قضية طلاق تعسفي وهون بيطلعلها تعويض وقروووش (ما هي الزوجة مش قليلة كمان) ما علينا. نرجع للأولاد شو قصتك معهم؟ (اصرف عليهم يا باشا)

المهم مرتك ليش ما تصرف عليها!! والا بس شاطر تركض وراها وتشتغل فيها حب وغرام! عفكرة مدامك قتلت حالك عليها ومتت عشان تكتب كتابك (فاعرف إنه من لحظة الكتاب  بتصير النفقة واجبة عليك.. بس المخطوبات ومكتوب كتابهن بيطلبوش.. بدك تحفظ هاللطش لأنها بنت عالم وناس)

أحلا شي بكون الزوج والزوجة يدفعوا رواتبهم التنين على الأولاد وبس يصير الطلاق، بصيروا اي شيكل عالولد زيادة! وبصير أبو الأولاد يقول: شو بلزمه الولد اكثر من 300 في الشهر (نسيت دخانك ابو 30 شيكل) ولك ابنك هااااظ

بعدين انو قال إنه المرأة عيب ترفع قضية نفقة! ما انت مش ساخي تصرف ع أولادك، وأنو قال اذا الحضانة للمرأة معناها انت تدفع هالكم ملطوش وتصُف وتطفي! كشيلها المرأة مش بكفي مصايب الرجال بتحولوها عليها: اذا الشاب هامل بتقولوا زوجوه عشان ينضب (المرأة مُصلِحة اجتماعية) اذا الشاب سكرجي وخمرجي بتقولوا زوجوه (المرأة مصح للعلاج من الادمان) واذا ختيار وترمل بتقولوا زوجوه عشان تخدمه (المرأة ملجأ للعجزة) في ناس هيك بفكروا! طب بدكم اياها مصلحة وفوق كل هذا لاحقينها عالنفقة؟ الله لا يوطرزلكم، كافؤوها لأنها بتضب الرجال!!

المشكلة إنه موارد الصندوق تعتمد ع رسوم عقود الزواج والطلاق، يعني كلما تزوجتوا وتطلقتوا بتزيد موارده، انا مش فاهمة هي الدولة فوق ما النفقة قليلة بتبلش ب 250 ملطوش عالطفل، كمان بدهاش تدعم الصندوق؟؟؟ خليهم يرتموا الأولاد في الشوارع –ويطلع جيل من الآخر-!!!

الله لا يوطرزلهم بعض الرجال بدكم قانون يلزمكم تديروا بالكم عالعيلة (وانتِ كمان مش قليلة تضلكيش تطلبي!) يحرك حريش النسوان!!!

 

شاهد أيضاً

الطبيب الحاج يحيى: صمّام الأمان

بروفايل بثينة حمدان   .. توقف قلب شابة بريطانية (27 عاماً) عن النبض، وبدأت قطرات …

بلد عايشة ع نكشة: شو بدك من الوزراء؟

بثينة حمدان وزير المواصلات: مكانك بين السواقين والفوردات في الشوارع وعالدوار والمفارق. وزير الزراعة: بدك …

العيشة حلم.. المقاومة ظُلُم!

بثينة حمدان أنا المقاومة انا صاروخ اذا طلع لفوق .. صعب إنه ينزل، أنا كلمة …

%d مدونون معجبون بهذه: